Into The Fraud

Into The Fraud
April 24, 2011 - Easter Sunday

Maaga akong gumising dahil may nagpapagawa sa aki ng PC sa sampaloc. Kahit ilang oras lang ng tinulog ko, gumising ako ng 11 AM(maaga na iyon) upang sumagot sa text kahapon kung pupunta ako o hindi roon sa nagpapagawa, Alas dos ako nakarating sa nagpapagawa at hindi ko alam ang sira ng PC. Sabi ng may-ari, ayaw na raw bumukas ng PC. Tinesting ko at ayaw ngang bumukas. Tinanggal ko ang power supply sa pagkakakabit sa PC at tinesting ko ito by jumpering the black and green wires habang nakasaksak sa outlet. Dapat bubukas ang fan ng PSU(power supply) pero hindi umikot, ibig sabihin sira ang power supply. Pinabili ko sila ng power supply at hinintay ko ito para ikabit. Pagdating nila, dala ang bagong power supply, tinesting ko ito tulad ng ginawa ko kanina, at gumana. Ikinabit ko na ito agad sa CPU. Bumukas ang PC, pero maya-maya ay namatay, kaya inayos ko ang connections ng wire sa loob. Ngayon hindi na ito namamatay. Nang bumukas, lumabas ang CMOS Checksum Error. Ibig sabihin naman nito, kailangan nang palitan ang CMOS Battery. Kaya pinabili ko rin sila nito. Pagtapos ay inupdate ko ang Panda Cloud Antivirus na inilagay ko dati. Tinignan ko rin kung may virus ito, at nabilib ako dahil wala. Magandang kombinasyon pala ang USB Disk Security + Panda USB Vaccine + Panda Cloud na free. Dahil sa tatlong iyon, walang virus sa loob ng anim na buwan! Pagtapos gumawa, naghugas ako ng kamay dahil hindi ko na ito makilala sa kapal ng alikabok. Inabutan ako ng 500 ng nagpagawa. Naisip ko kung idadagdag ko na lang ito sa aking Smart Money para makabili ng SDRam sa eBay. 1GB SDRam (2x 512MB) for approx. 700 pesos, brand new, o dito na lang ako bibili, hindi na sa net.

Nagpaalam na ako sa mababait na mga nagpagawa, at sumakay ako ng jeep na Quiapo. Wala akong balak gastusin ang pera ko ngayon dahil 512MB naman ang memory ng Pentium III sa bahay(previously 192MB). Salamat kay Dave (kaklase at kaibigan ko nung elementary) at ibinigay niya ang kanyang Ram sa akin pagtapos kong gawin ang PC nila kahapon.

Pagdating sa Quiapo, ang balak ko lang ay tumingin at magtanong ng mga parts na kailangan ko. Ngunit nang mapadpad ako sa likod ng Raon Center, sa Gonzalo Puyat St., parang na-brainwash ako habang nagtatanong. Bago pa man ako bumili, napayuhan na ako ni itay na lokohan ang mga tindahang iyon. 200 daw patesting. 'Pag sira, testing ulit, 200 ulit. Doon raw sila kumikita. Pero sabi ko sa sarili ko, gusto kong matuto. Gusto kong malaman kung anong kahihinatnan ko, kaya bigla akong napatanong at napa-tawad sa presyo ng Ram. 350 Pesos daw ang 512MB. Sabi ko 600 na lang dalawa. Dagdagan ko raw ng 50, sabi ko 600 na lang, dalawa naman bibilhin ko. Ibinigay niya sa akin ang double-sided na ram, dalawa. Maliit kumpara doon sa ipinakita niyang sample kanina na single-sided at may sticker na 512MB. Bibigyan niya raw ako ng 2-months warranty. Mukhang kapani-paniwala hindi ba? Sabi pa niya, "Double-sided 'yan mas matibay". Single-sided kasi 'yung sample kanina. Pero yung ibinigay niyang "double-sided na mas matibay", walang sticker. Sinabi ko sa kanya ng tatlong beses, "Kuya 'pag may problema, papapalitan ko ha...". Pero sa tatlong beses na iyon, hindi siya makatingin ng maayos o diretso, na para bang ilang. Binigyan niya ako ng resibo, resibong generic. Walang pangalan ng tindahan at number ng resibo, kundi date at items lang. "Michael ang inilagay niyang pangalan, at hindi ko alam kung pangalan nga ba talaga niya iyon, o pangalan niya sa mga ganitong transaksyon. Wala akong alam kung gumagana ba ang ibinigay niyang Ram.

Umuwi ako ng diretso, at laking pasasalamat ko sa itaas dahil binigyan niya ako ng pambili ng Ram. Itetesting ko na ito sa bahay. Tinanggal ko ang dalawang 256mb na ram na ibinigay ni dave, at isinalpak ang bagong ram. Tiningnan ko sa BIOS, 32mb lamang ang nakalagay. Ang isa, 32MB, pero 'yong isa, hindi gumagana. Sabi ko tuloy, "sabi na nga ba!", kaya nagmamadali akong nagbisikleta pabalik sa tindahan kahit alam kong mag-aala-sais na. Pagdating ko roon, wala na si Michael. Umuwi na raw, linggo kasi kaya maaga raw sila nagsasara. Umuwi akong badtrip.

Kinabukasan, hindi ako pumasok sa eskwela ng ala-una (may summer class kami) para balikan ang tindahan at matahimik ang aking kaluluwa. Pagdating ko sa tindahan, wala na raw si Michael.

Ako: Kuya nasaan si Michael?
Mamang-loloko 1: Ah, wala dito. Tingnan mo do'n, do'n ang pwesto nila.
Ako: (Sa kabilang pwesto) Kuya si Michael?
Mamang-loloko 2: (Parehas ang sinabi)
Ako: (Bumalik) Kuya wala eh, 'di niyo ba pwede palitan?
Aleng Manloloko rin: Wala kaming tindang ganyan eh, sa kanya mo papalitan.
Ako: (Pumunta sa pangatlong kariton) Kuya nasa'n si Michael?
Mamang-loloko 3: Ah, si Michael, yung nahuli kanina..
Mamang-loloko 4: Nagkahulihan ba kanina?
Mamang-loloko 3: Oo, 'yung maramihan, marami nahuli.
Ako: ??? Wala namang hulihan kanina ah. (Kahit hindi ko alam kung meron nga.)
Mamang-loloko 3: Ay! Wala ba?

Alam kong nariyan lang si Michael, nasa ibang puwesto, nambibiktima ng ibang tulad ko. Napansin ko, ang tao kahapon, iba sa tao ngayon. Araw-araw siguro, ang taktika nila, ibang tao kada puwesto sila araw-araw pero parehong kariton.

"Tandaan mo ang puwesto ha." Ang sabi ng singkit na tindero kahapon nang makapag-bayad na ako.
"Huwag mo nang anuhin baka magbago pa isip!" Ang sabi naman ng kasama niyang tindera.

Bigla kong naalala ang mga salitang ito habang iniisip ko kung babalik pa ba ang perang pinagpawisan ko o mawawala na lamang iyon tulad ng iba pa nilang mga nabiktima.

Pumunta na lang ako sa JASHS Music Lounge (formerly Music Ave.), bar na pinago-OJT-han ko. Sinabi ko kay Ma'am Clotha (president ng bar) na 'yong isang Pentium III ay naiupgrade ko na at puwede nang gamitin pang-office works. Ang sabi sa akin ilista ko ang mga ginastos ko at inabonohan ko para ibalik niya. Inilista ko ang mga ginastos ko kasama ang ram ni Dave na dalawang 256MB sa halagang 600. Nang ibinigay ko ang lista, binigay niya sa akin ang nagastos kong pera. Ang nawalang 1050 pesos in 24 hours, naibalik ngayon (450 sa keyboard at mouse, 600 sa ram) at may tip pang 100 pesos.

Umuwi ako sa bahay at kinuha ang keyboard and mouse na bago. Dinala ko ito sa bar at inilagay sa Pentium III doon sa office, at in-install-an ng OS. Hindi ko na muna itinuloy an installation ng mga karagdagang softwarez dahil hindi ko dinala ang ram ni dave, at bukod dito ay hindi pa rin napapalitan ang CMOS battery. 3AM na ako natapos sa OS, at kinabukasan ko ito itinuloy.

Sa pagisip-isip ko, hindi naman ako nawalan talaga dahil naibalik naman agad ang nawala kong pera. Marahil dininig lamang ng nasa itaas ang kagustuhan kong matuto. Puwes natuto na ako, at ito ang natutunan ko. Huwag masilaw sa mga panindang napakamura ng presyo lalo na't hindi mo ito nakikitang gumagana bago mo ito bilhin. Bago magbayad ay siguraduhing gumagana ang bibilhing produkto. Sana ay makatulong at magsilbing gabay ito para sa inyo na bibili pa lang ng mga bagay na nais niyong bilhin.