Showing posts with label Poetry. Show all posts
Showing posts with label Poetry. Show all posts

Saturday, September 7, 2013

Ano Nga Ba Ang Tula?

- 0 (mga) komento

Kung ikaw ang tatanungin, ano nga ba ang tula
Ano nga ba ang laos na raw na larangan ng paggawa
Ng mga salita at mga linyang 'di lamang sa dulo may tugma
Ngunit pati na rin sa buhay at karanasan ng may-akda

Ano nga ba ang tula na nagsasaad ng damdamin
Na sa pamamagitan ng tugma ay nabibigyan ng sining
At nabibigyan din hindi lamang ng lalim
Kundi pati na rin damdaming layunin ay magpahiwatig

Ano nga ba ang tula na may laman ng tawa at ngiti
Minsa'y naglalaman ng lungkot at pighati
Na katumbas ay tagumpay at pagkasawi
Na kung sa tula ilalahad ay tiyak na natatangi

Ano nga ba ang tula para sa 'yo kaibigan
Na maaari o maaaring hindi mo minsang nahiligan
Ngunit sana'y iyo man lamang masubukan
Gumawa ng tula kahit lamang katuwaan

Hindi naman lahat ay isinilang na makata
At hindi rin naman lahat ay mga mambabasa
Ngunit panahon ngayo'y lunod na sa teknolohiya
Mga tula'y nilalapatan na ng dagundong at kaunting nota

Na ang mensahe kung mayro'n ma'y natatabunan na ng lubos
Sining ng pagtula'y dito na ba magtatapos?
Tanging buga't dagundong na lang ang napapansin
Liriko't mensahe pa'y bastos kung susuriin

At kung minsa'y mga makata'y nagsisipagtagisan
Ng kani-kaniyang galing sa palaliman
Ngunit paligsahan nama'y labanan ng kayabangan
Bakit ba nahiligan ang gan'tong klase ng larangan

Na imbis na itaas pa at palawakin ang lawig ng sining
Ay tila pa't nag-iiba lalo't nawawalan ng ningning
Sa kagustuhang buhayin ay lalo pang naililibing
Kailan ba magigising mula sa pagtulog ng mahimbing? 

O marahil ang tula ay hindi naman talaga pinapatay
Ngunit ay nag-iiba lamang ng anyo at kulay
Nag-iiba kasabay ng paglipas ng panahon
Ibang-iba kumpara sa panahon noon

Ano nga ba ang tula noon, at ano ang tula ngayon
Parehas lamang na tula ngunit magkaiba ng panahon
Kung dati-rati'y mga tula'y kagiliw-giliw na basahin
Ngunit ngayon kung gumawa ka ng tula'y di maiwasang asarin

Na ikaw ay makaluma't wala na sa panahon
Isa kang makatang hindi nabuhay noon
At isinilang ngayo't gumagawa ng akda
Kahit wala nang magbabasa'y patuloy pa rin sa paglikha

Ngunit wala naman talaga silang magagawa
Walang awitin kung walang tula
Walang pangungusap kung walang salita
At walang kahit ano kung walang lumikha

Muli natin balikan kung ano nga bang kahalagahan
Ang tanong na kung "ano ba ang tula?" tila wala nang kabuluhan
Dahil basta't pantig ay bilang at sa dulo'y may tugma
Tula nang maitatawag sa ganitong klase ng akda

Ngunit ang tunay na kahulugan iyo lamang makikita
Kung ika'y magbabasa bilang isang mambabasa
At hindi bilang nagbabasa lang ng kung anong nakasulat
Dahil mensaheng nakapaloob ay higit pa sa mga salitang nakalapat

Malalim man o mababaw mga taludtod na nakalahad
Layuning magparating ng mensahe ang tanging hangad
Nguni't anumang nais iparating ay saka lamang mabubuksan
Kung mga taong titingin ay mga bukas din ang isipan

Kaya't kaibigan, kung ikaw ang tatanungin
Maaari o maaari rin naman hindi mo na sagutin
Bukod sa may bilang ang pantig at sa dulo'y may tugma
Para sa iyo, ano nga ba ang tula?
[Continue reading...]

Tuesday, September 3, 2013

Ulan

- 0 (mga) komento



Simoy ng hangi'y tila lumalamig
Pakinggan mo ang langit ito'y yumayanig
At ang mga patak hindi mo ba naririnig?
Unti-unting binabalot ang paligid ng lamig


Ihip ng hangin bahagyang lumalakas
Ipasok mo na ang mga sinampay sa labas
Bago pa man mga ito'y liparin sa lakas
O mabasa ng ulan at sambitin mong 'malas!'


At heto na nga't ang ulan na'y bumuhos
Hindi mo alam kung kailan matatapos
Kaya't pagbuhos ng ula'y iyo munang pagmasdan
At subukan magbilang ng mga patak ng ulan


Ang bawat lupang nauuhaw ay dinidiligan 
Binibigyang buhay ang mga halaman
Na madalas sinisira't pinapabayaan
Dinidiligan ngayo't inaalagan


Kung nalulungkot ka'y subukan mong lumabas
At damhin ang mga patak ng ulang lumalakas
Luha mong pumapatak ay isabay sa pag-ulan
At hayaang damdamin mo rin ay mahugasan


Sadyang napakalamig, at sadya ring kabaligtaran
Ng pag-ibig mong nag-aalab, ginaw na dulot ng ulan
Sa dilim ng gabi, at sa gitna ng daan
Hayaan ang damdaming nalulungkot na mahugasan


Tulad ng mga halaman na mananatiling buhay
Dinidiligan pagka't sila'y nagbibigay kulay
Sa buhay na matamlay tulad ng pag-ibig na tunay
Na wala nang hihigit pa kung ito'y iyong iaalay


At ngayong ula'y unti-unti nang tumitila
Ihip ng hangin ay bahagya nang humihina
Sa pagtila ng ulan madarama mo na nang payapa
Katahimikan sa paligid ay katahimikan din sa diwa


Makinig sa ibang mga tugtugi't awitin
Anila sa tuwing umuulan, araw ay sisikat din
Ay tulad din ng mga pagsubok at suliranin
Na kung darating ma'y tiyak na malulutas din


At sa bawat simula ay naro'n din ang hangganan
Ngunit sa bawat hangganan ay may bagong simula naman
Na tila ay nagsasalit-salitan lamang
Ngunit may natututunan sa bawat paghakbang.
[Continue reading...]

Sunday, June 2, 2013

5 Senses

- 2 (mga) komento


Pumikit.
Isarado ang mga mata sa tanawin ng sakit.
At tumingin sa mga bagay na hindi nakikita
Ng mga matang madalas nalilinlang at naaakit.

Makinig.
Itikom ang bibig at papasukin ang tinig;
Ang ingay ng katahimikang nakabibingi
Ang siyang titikom sa maingay na bibig.

Tikman,
Hindi lamang ang sarap kundi pati na rin ang hapdi
Mapalad ang nakararamdam ng hapdi kumpara
Sa mga taong nakararamdam lamang ng sarap.

Langhapin,
Ang ginhawang dulot ng paghihirap.
Wala nang mas sasarap pa sa bagay na nakamtan
Buhat ng paghihirap at pagsisikap.

Damhin,
Ang anumang biyayang ipinagkaloob
At huwag nang isipin ang anumang wala,
Bagkus ay magpasalamat sa anumang mayroon.
[Continue reading...]

Tuesday, January 1, 2013

Bagong Taon

- 0 (mga) komento
http://3.bp.blogspot.com/-rlFJhS8SR5Y/UCn68Y2udPI/AAAAAAAAFk4/d6DiW8wmv6w/s1600/new_year_wallpaper_2013-8.jpg

Bagong taon, bagong buhay
Bagong kalendaryo, bagong kulay
Bagong gupit, bagong damit
Bagong palit, bagong kabit

Puro bago, walang luma
Di nila alam, taon lang ang bago, lahat luma.
Ano pa bang meron sa bagong taon
Bakit lahat gusto bago ngayon?

Sa bagong taon, laging hinihintay
Bagong pag-asa upang magbagong-buhay
Pero bakit pa ba kailangang maghintay
Ng isang taon para magbagong buhay?

Gagawa ng listahan tungkol sa pagbabago
Siguraduhin mo lang na hindi mo ginagago
Ang sarili mo tungkol sa pagbabago
Baka ningas-kugon ka lang tulad ng mga gago?

Pero mayroong maganda ngayon bago ang taon
Bukod sa bago ang kalendaryong yari sa karton
At ito ay ang buhay na ipinagkaloob sa atin
Biyayang kilalanin na tayo ay buhay pa rin

Kaya marapat lamang na magpasalamat
Sa buhay na tinatamasa nating lahat
At tayo'y nananatiling buhay at masigla
Masiglang sinalubong ang panibagong umpisa

Umpisa na naman ng taon, buwan at araw
Umpisa ng pagkakataong muling makakain ng lugaw
O kaya'y magpaluto ng bitukang iniihaw
Bagong umpisa na nagbigay liwanag sa daang mapanglaw

Kaya ikaw, huwag kang tatamad-tamad
Huwag kang sa computer lang magbabad
Sulitin mo ang bagong taong ibinigay
Ibinigay sa iyo upang makapagbagong-buhay.
[Continue reading...]

Sunday, December 30, 2012

Berso sa MOA

- 0 (mga) komento

Kasalukuyan kong nilalasap ang malamig na hangin
Sa balat kong manipis, ito'y dumadampi sa akin
Habang ako'y nakaupo't payapang pinakikinggan
Ang natatanging tinig ng nakabibinging katahimikan

Narito ako't naghihintay sa pinakamamahal kong kasintahan
Ang kanyang kamay, ako'y sabik na muling mahawakan
At kanyang mukha na labis ang taglay na kagandahan
Di na ko makapaghintay na muli itong masilayan

Dito sa pasyalan, pamilihan at tambayan
Sa kanto ng kainan ng pulang mamang may manukan
Upang hindi mainip ay idinaan na lamang sa tulaan
Nakaupo ako't naghihintay sa pinakamamahal kong kasintahan

Buhok na kay lambot, kutis na kay puti
Mga matang nagniningning at ang mapulang mga labi
Samahan mo pa ng ngiting katangi-tangi
Sa tuwing nakikita ko'y pagod ay napapawi

Para bang nasa bukirin na maraming damo
At may mga bulaklak sa paligid nito
At mayroon ding lumilipad na mga paruparo
O anong saya sa tuwing ika'y kapiling ko

Hindi ko maipaliwanag ang sayang nadarama
Ang sayang nakakamtan kapag kasama kita
Dalangin lang sana'y huwag nang matapos pa
Kaya hanggang sa pagtulog, pinapangarap ka

Ako ba'y tulog o nananaginip ng dilat?
Mga mata ko'y bukas ngunit wala sa ulirat
Tila heto na naman ang isipan kong lumilipad
Isipan ko dahil sa'yo'y kung sa'n-sa'n napapadpad

Ngunit parang totoo anuman ang nakikita ko
Mukhang tapos na ata ang paghihintay na ito
Ikaw nga ata itong papalapit sa'king harapan
At narito na nga ang pinakamamahal kong kasintahan.
[Continue reading...]

Tuesday, November 6, 2012

Hindi Ako Makapagsulat

- 0 (mga) komento


Isang tula na hindi ko na natapos gawin.

Sa harap ng mesa na kulay dilaw,
Sa ilalim ng liwanag na mula sa ilaw
Nakaupo sa silya na ang paa'y unat
Ay isang ako na hindi makapagsulat

Sa dami ng salita, sa dami ng talata
Hindi makagawa ng isang simpleng akda
Ngunit heto pa rin at nagpupumiglas
Nagpupumilit makawala sa rehas

Sa mga bakal na rehas na singkapal ng troso
Nakakulong ang isipan kong natutuliro
Nagiisip kung ano nga bang nararapat
Sa makinis na papel ang aking isusulat

Tumingin ako sa wala at ako ay napaisip
Sa tagal ng panahon ako ay napaidlip
Kayrami nang nagbago at kayrami nang naglaho
Oras na nasayang, maibabalik ba ng panaginip?

[missing stanza here]

Wala ka man lapis, ikaw na ay nagsusulat
Sa papel ng buhay kahit ika'y di pa mulat
Sa katotohanang ikaw ay kapos
Balang-araw maiintindihan mo ring lubos

[missing stanza here]

[missing stanza here]


At ngayo'y naririto't naghahanap ng paraan
Sa papel ng buhay gumagawa ng dahilan
Kung bakit, kailan, paano at saan
Nagmula at naimbento ang salitang katamaran

Sa harap ng mesa na kulay dilaw,
Sa ilalim ng liwanag na mula sa ilaw
Nakaupo sa silya na ang paa'y unat
Ay isang ako na hindi makapagsulat

Ng mga bagay na nais at dapat mangyari
Ang pluma ng buhay sino ba ang may-ari?
Tayo ba na may sariling mga papel
O ang kapalarang kung minsan ay taksil?



[missing stanza here]

[missing stanza here]

[missing stanza here]

[missing stanza here]



[stupid stanza here]

Buti pa ang ibon, lumilipad-lipad
Sa himpapawid kung san-san napapadpad
Ngunit si batman ay palaging kawawa
Atang ng marami, Siya na lang ang bahala
[Continue reading...]

Tuesday, October 30, 2012

Alaala

- 0 (mga) komento


Ako ay napalingon sa may dako paroon
At aking pinagmasdan ang pangarap ko noon
Tila bang gumanda, umunlad at tumamis
O mga ngiting taglay noo'y napalitan na ng tangis?

Para bang inumin na pagkatamis-tamis
Na sa asukal ay lunod at bugbog ng labis
Biglang nawawala't para bang winawalis

Sa paglipas ng panaho'y nawala na ang tamis

Ang pundasyon ng mga pangako na magtatayo ng hinaharap
Unti-unting naglalaho sa bawat mong pagkurap
At kahit anong sarap ng pagsasamang-maluwat
Hindi mo man asahan, maglalaho rin ang lahat

Sa pagdating ng panahon na'ng lahat ng ito'y wala na
Lahat ng tamis at pait na iyong nadarama
Mumunting mga larawan mga tanging matitira
Kayamanang maituturing ang mga alaala.
[Continue reading...]

Sunday, February 12, 2012

Walang Pamagat

- 0 (mga) komento
Walang Pamagat
Ni Jay Ocampo

I
Mga bagay na
minsan ko lang gawin
At mga salitang
minsan ko lang sambitin

II
Lahat ay nagbunga
ng hindi ko gustong gawin
Iyon ay ang
hindi ko na muling ulitin.

III
Nakagagawa ako ng tula
Na may sangkap ng mga salita
Buhat sa mga naganap
At sa mga mumunting pangarap

IV
At sa mga tulang iyon
Nais kong ipabatid
Na hindi sa lahat ng oras
May kakayahan kang ipahatid

V
Ang iyong nadarama
na sa puso mo'y nagkukubli
Anumang isinisigaw,
iyan ay tiyak na natatangi

VI
Maligaw ka man sa alon
ng karagatan malalim
O hagipin ng hangin
At maglaho sa kulimlim

VII
Hindi maagaw,
hindi mawawala
Damdamin sa puso'y
Huwag itapong palihim

VIII
Oras ay walang hanggan
Ngunit oras ay lumilipas
Gaano man kabago
Ay tiyak na kumukupas

IX
Kaya kung ako sa iyo
Ay huwag mo nang sayangin
Mga pagkakataong
Minsan mo lang maangkin

X
At kung huli na ang lahat
upang ikaw ay kumilos
Palabas man o paloob
Luha mo ay bubuhos

XI
Hindi lahat ng nilalang
Ay nabiyayaan ng oras
Upang mabuhay ng matagal
Sa mundong marahas

XII
Dumarating ang panahon
Na tayo ay nalilito
Kung bakit pa nabuhay
kung ikaw rin ay mamamatay

XIII
Kung mayroon ka mang problema
Na hindi mo ikinamatay
Magdiwang ka sapagkat
Napahaba mo ang iyong buhay

XIV
Kung ika'y naglalakbay
Kahit madilim ang daan
Ika'y makararating
Basta't alam mo kung saan

XV
Pagka't tayo ay naglalakbay
Naglalakbay ng sabay-sabay
Magkakaiba man ng daan
Sa dulo, lahat ay nahihimlay

XVI
Akin nang tatapusin
Ang mumunti kong tula
Pagka't umiral na naman
Aking pagiging makata

Ang Tula, bow.

PS: Umiral na naman ang pagiging korni ko sa dis-oras ng gabi. Bigla-biglang may tula na lang na lilitaw sa notepad at ipopost sa blogger. Tapos wala pang pamagat.
[Continue reading...]

Thursday, October 20, 2011

Time

- 0 (mga) komento
Lurking in the darkness and searching for the light
Of the world of happiness where everything's alright
Looking for something that once I have had
It's nowhere to find and it feels bad

Like a bird flying over the sea
Flying restlessly to find a tree
Crossing the endless horizon of burden
Hoping that someday I would be forgiven

They said everything has an end
Except this suffering, my heart wouldn't mend
I know how it feels, and I know I am wrong
I know it would take time and it's very very long

Time can heal all kinds of pain
But time is endless which drives me insane
I'll just wait and wait 'till someone came
How I wish I could forget your name.

Isang malungkot na tulang nilikha ko noong hunyo. Ngayon ko lang tinapos. Buti nahalungkat ko sa aking flash drive.
[Continue reading...]

Monday, May 9, 2011

Hanging Naglilibot

- 4 (mga) komento
Sa gitna ng gabi, ako ay nagising
Sa tunog ng yero na kumakalansing
Ang mga bubungan ay pilit kinakalog
Ng hanging naglilibot mukhang ayaw magpatulog

O bakit ba naman ganito ang panahon?
Sa gitna ng tag-araw ay may malakas na ambon
Isang grupo ng mga ulap na tila naliligaw
Dito pa nagpapalipas ng gabi't, sumisigaw.

Ayokong lumabas 'pagka't baka may tangay-tangay
Ang hanging malakas baka may yerong sumasakay
At ako'y madisgrasya sa aking paglalakbay
Dito na lang ako sa loob ng aming munting bahay.

Maghihintay mapagod ang hanging naglilibot
Magbibilang ng butiki upang hindi mayamot
Habang tinatakpan ng makapal kong kumot
Huwag sana akong kagatin ng maliliit na surot.

Ang aking sikmura'y biglang kumalam
Ngunit kanin lang ang meron sa kusina't walang ulam
Lintik na sikmura, nais pa 'kong palabasin
Ang hanging naglilibot nais yatang kumustahin.

Ako ay nagpasyang lumabas ng tahanan
'Pagka't aking sikmura'y malungkot, walang laman
Sa aking paglabas nariyan ang naglilibot na hangin
Isang malamig na pagsalubong ang ibinigay niya sa akin.

Ako ay nagtungo sa malapit na tindahan
Isang kainan na nakabukas magdamagan
At ako'y kumain ng masarap na pagkain
Tiyak tuwang-tuwa ang tiyan kong gutumin.

Ako ay inihatid ng naglilibot na hangin.
Busog akong nakauwi patungo sa bahay namin.
Mabuti na lang at walang tangay-tangay
Ang hanging malakas walang yerong pinasakay.

At nagpatuloy sa pag-iikot ang hanging naglilibot
Akin nang binalikan ang makapal kong kumot
Makapagpahinga na muna at nang bumaba
Ang kinain kong pagkain ay matunaw sa sikmura.

Ang hanging naglilibot ay patuloy sa pag-iikot
Patuloy sa paglalakbay nang hindi nayayamot
Sa aking paghimlay ay akin ding napansin
Mayroon palang dahilan ang paglilibot ng hangin.

Naglalakbay, umiikot, sa bintana lumulusot
Ipinadarama ang lamig ng hanging naglilibot
Hindi kayang tapatan ng iyong unan at kumot
'Pagka't lamig ng hangin, sadyang nanunuot.

Hanging malamig ang pangunahing sangkap
Sa mahimbing na tulog at sa masarap na yakap
At kung naiinitan ay huwag nang paghintayin
Hanging kumakatok ay iyo nang papasukin.

O kay sarap talagang mahimlay ng ganito
Kung hanging naglilibot ang magpapatulog sa iyo
Sige lang yakapin mo ang iyong unan at kumot
'Pagkat hanging nag-iikot ay hindi mapag-imbot.

Hanging naglilibot ako sana'y patawarin
Kung kanina ako'y galit, ako'y bigyang paumanhin
Ako na'y mahihimbing mula sa aking pag-gising
Maraming salamat sa iyong pagdating.

Nais ko sanang sumama sa iyong paglalakbay
Dalhin mo ang aking isip, sa iyo ay isakay
Sa himpapawid ang isip ko'y maglalakbay
Habang katawan ko'y payapang nahihimlay.

Hanging naglilibot, ikaw ang nagbibigay
Ng mapayapang gabing sa aming minsa'y nawawalay
Ang tula kong ito sana'y iyong tanggapin
Mag-ingat sa paglalakbay, kaibigan kong hangin.
[Continue reading...]

Saturday, May 7, 2011

Sa Harap ng mga Patay-Sinding Ilaw

- 0 (mga) komento
Sa Harap ng mga Patay-Sinding Ilaw

Ang mga kamay ng orasan ay nakatutok na naman
Sa buwang nagniningning doon sa kalangitan
Habang ang hangin, unti-unting lumalamig
Sa paglalim ng gabi, simula pa lang ng kasiyahan.

Tumingin ka sa labas at makikita mo
Ang mga taong papalapit, papunta sa lugar na ito
Mag-iinom, magsasayaw, magdidiwang at magsasaya
Maglalaklak hanggang sa magsuka, bukas wala ka nang pera.

Bago ka makapasok, ika'y kakapkapan
Ng guwardiyang nakabantay na hangad ay kaayusan
Ang laman ng iyong bag ay kanyang titingnan
Baka may patalim, maaari bang malaman?

Pagtapos kapkapan kung may patalim
Ikaw ay gagabayan 'pagka't medyo madilim
Papunta sa mesang nais mong puwestuhan
Oras na upang pumili ng nais mong lantakan.

Sa kapirasong papel na pinatigas ng plastik
Ay pilian ng mga pagkaing sa kolesterol ay hitik
Nariyan din ang mga inuming sa iyo'y lalasing
Tingnan muna ang pitaka bago ka humiling.

Ilang sandali lang, iyan na't paparating
Inumin at pulutan na iyong hiniling
Kung may kailangan pa'y huwag mahiyang magsabi
Pagka't mga nakatayong nakaputi ay handang magsilbi

Iyong pagmasdan ang mga patay-sinding ilaw
Walang ibang inaakit kundi ikaw at ikaw
At iyong pakinggan ang tugtog na umaalingawngaw
Ilang dagundong pa ba'ng kailangan upang ikaw ay sumayaw?

Ayan na nga't ikaw ay napatayo
Sa dagundong ng tugtog ikaw ay napabayo
Sabayan mo na ang mga taong umiindak
Iwanan muna sandali ang boteng nilalaklak

Patungo sa gitna, kasabay ng marami
Ikaw ay sumasayaw at wala kang paki
Kung ano mang sayaw ang dikta ng iyong katawan
Ang mahalaga'y dama mo ang alingawngaw ng kapaligiran.

Habang sumasayaw ay iyong nalilimutan
Mga problema mo, sa labas iyong iniwanan
Sa harap ng mga patay-sinding ilaw ikaw ay masaya
Nagsasayaw kasama ang mga hindi mo kilala.

Ngunit tadhana nga nama'y sadyang malupit
Problema mong tinatakasan ay pilit kumakapit
Sa pagpasok mo pala'y meron sa'yong nakakita
Isang testigo sa ginawa mong trahedya.

Kanyang nakita ang ginawa mo sa dilim
Doon sa iskinita nang magtatakip-silim
Saksi sa inyong hindi pagkaka-unawaan
Na humantong sa isang madugong bakbakan.

Ilang suntok at ilang tadyak ang inabot nya sa iyo
At umpog sa pader na sa kanya ay humilo
Duguan na't baldado ngunit 'di ka pa kuntento
Sa galit mo ay pinaghahampas mo pa ng tubo.

Sa iskinitang iyon ay may napupunding ilaw
Patay-sindi tulad din doon sa may mga nagsasayaw
Doon mo iniwan ang kawawang walang malay
Sa harap ng patay-sinding ilaw, siya'y binawian ng buhay.

At ngayong gabing ito, iyo nang malalaman
Ang paghahatol sa ginawa mong kalokohan
Dali-daling nagsumbong ang testigo sa nangyari
Kapatid pala ng parak and tao mong dinali.

Habang nagsasayaw sa gitna ng marami
Ay dumating ang parak na kapatid ng dinali
May galit sa mukha at may baril sa kamay
Mukhang nais kang pagbayarin sa kinuha mong buhay.

'Di na napigilan ng guwardiyang nakabantay
Ang pagpasok ng parak na tila may sungay
Ikaw ay tinanaw-tanaw sa loob ng sayawan
nang makita ka ay bigla kang tinutukan.

Ang bibig ng baril , sa batok iyong naramdaman
Tumigil ka sa pagsayaw at tiningnan ang likuran
Nakita mo ang mukha ng parak na may galit
Kahawig ng taong inihatid mo sa langit.

Bigla kang nanlamig at bigla kang namutla
Kitang-kita ang matinding takot sa iyong mukha
Katapusan mo na, iyan ang tangi mong naisip
Pagpapatawad ng parak ay hindi mo na masilip.

Isang putok ng baril ang huli mong narinig
Ni hindi mo na namalayan, paglagapak mo sa sahig
Nagtakbuhan papalabas ang mga nagsasaya
Sa harap ng mga patay-sinding ilaw kayo lang ang natira.

At unti-unting napanatag ang parak na may galit
Dahil hustisya ng ng kapatid ay kanya nang nakamit
Maya-maya pa'y ang parak ay lumisan
Magaan ang loob na dumiretso sa tahanan.

Sa harap ng patay-sinding ilaw, ikaw ay iniwanan
Tulad ng ginawa mo sa taong iyong napag-initan
Huli na ang lahat upang ito'y pagsisihan
'Pagkat sa harap ng mga patay-sinding ilaw, problema'y di matatakasan.
[Continue reading...]
 
Copyright © . High's Kul... Life Online - Posts · Comments
Theme Template by BTDesigner · Powered by Blogger