Pagkain

Maraming klase ng pagkain. May masarap na pagkain, may hindi. Merong akala mo pagkain, meron naman akala mo hindi kinakain. Meron din panis at may hilaw. May matabang at meron ding sobra sa lasa. Minsan masarap kumain lalo na kung hindi mo alam na panis na pala ang kinakain mo. O sa sobrang libang mo, pati pagkain ng aso kinakain mo na rin.

Tumungo tayo sa iba't ibang klase ng pagkain.

Kakanin - Mga pagkaing gawa karaniwan sa kaning malagkit, kaya minsan nababadtrip ka dahil dumidikit sa kasuluk-sulukan ng ngipin ang kinain mong kakanin. Noon napansin ko lahat nasa mall na, isa na lang kulang, kakanin. Pero makalipas ang isang linggo mula nang sinabi ko iyon, nakakita ako ng sapin-sapin, nasa mall. Grabe talaga ang mga mall, pati kakanin sinakop.

Street foods - Mga pagkain na kinakain ng mga characters sa Street Fighter,. corny..
Ang mga street foods ay mga pagkaing mabibili sa kalsada tulad ng fish ball, squid ball, chicken balls, meatballs a.k.a. flour ball (yung binilog na harina tapos pinrito), kikiam, pugo, kalamares (mga galamay ni kraken), isaw, at marami pang mga katulad nito. Karaniwan, sinasabihan tayo ng mga guro natin mula kinder hanggang hayskul na huwag bumili ng street foods sa labas ng eskwelahan sapagkat marurumi ang mga ito, (at bumili na lamang sa kanilang mga tindahan para naman kumita sila) at maari tayong magkasakit. Kung bibili ka ng street foods sa loob, street foods pa rin ba ang tawag doon? Marami na ngayon sa mga mall at istasyon ng LRT at bus ang nagtitinda ng mga street foods kahit wala naman sila sa street. Karamihan ay nagpa-franchise pa ang mga ito. Sa katunayan, inaagawan nila ng trabaho ang mga naglalako at nagkakariton na mga tindero ng street foods, at itinitinda pa nila ito sa mas malaking halaga. Pansinin mo, may naglalako pa ba ngayon ng ice scramble? Sa lugar namin wala na. Maaaring sinakop na ng mall ang streets kaya ang mga ganitong pagkain na binibili natin noong bata pa tayo ay makikita na rin sa mga mall, o sinakop na ng streets ang mall kaya pati tuhog-tuhog nasa mall na rin.

Go,Glow,Grow foods - Mga pagkain karaniwang inihahain sa agahan, tanghalian at hapunan. Kapag panahon ng kagipitan, magandang kumain ng Go foods, mura lang ang itlog at tuyo. Kung may pambili naman, Glow foods, tiyak na lulusog ka. At kung marami kang pambili, punta ka sa andoks at umorder ng Grow foods. Ang galing 'no? May category ang pagkain na naaayon sa antas ng pamumuhay natin.

Artificial Foods/Junk Foods - Mga pagkaing artipisyal na nakikita sa junk shop(corny), kunwari pagkain pero hindi. Mga pagkain ito na gawa sa kemikal na maaaring nakasasama sa ating kalusugan. Kapag ang isang prutas ay nabulok, hindi na glow food ang tawag dito, isa na itong junk food dahil hindi na dapat ito kinakain at isa na itong junk, sa talagalog, basura. In short, lahat ng pagkain kapag nabulok, nagiging junk foods. Pero hindi ibig sabihin na ang mga sitsirya na nabibili ay mga bulok na, pero categorized ang mga ito na junk dahil hindi naman ito nakatutulong sa ating kalusugan.

Food supplement - Hindi ito pagkain. Ang food supplement ay pampuno ng mga sustansyang hindi mo nakuha sa mga kinain mo sa araw na iyon. Mga pantulong lamang ito para mapunan ang mga bitaminang kailangan mo ayon sa binili mong food supplement. Akala ko noon kapag gutom ka pero ayaw mong kumain, inom ka lang ng food supplement busog ka na. Pero hindi pala, food alternative pala ang tawag doon.

Drinks - Mga pantulak sa mga kinain mo para bumaba ang mga ito sa tiyan mo. Karaniwan, tubig ang ating panulak. Pero kung matapang ka, gawin mong panulak ang Gin, tapos chaser mo hard drinks. Pag sumuka ka, ulit ka.

Masarap kumain ng mga pagkaing masasarap, kabaligtaran naman kung hindi masarap. Kung browser lamang ang hapag kainan, marami na akong naibookmark na tindahan ng masasarap na pagkain at ida-download ko na lamang ang pagkain hangga't may bandwidth pa ang aking bulsa at ise-save ko sa aking digestive hard drive. Kung masobrahan, punta sa desktop at buksan ang recycle bin upang magbawas ng undigested files. Iyan lamang po, sana ay natuwa kayo sa inyong nabasa. Maraming salamat!